पूर्व कॅडेट प्रशिक्षण केंद्र - नाशिक

१९६२ च्या भारत-चीन युद्धाच्या विशेष परिस्थितीत, महाराष्ट्र शासनाने तरुण महाराष्ट्रीयनांना भारतीय सैन्यात अधिकारी पदांसाठी अधिक संधी मिळाव्यात म्हणून पूर्व कॅडेट प्रशिक्षण केंद्राची संकल्पना सुरू केली. त्यानुसार, महाराष्ट्रातील चार महानगरांमध्ये प्रशिक्षण केंद्रे सुरू करण्यात आली. कालांतराने, अहमदनगर येथील प्रशिक्षण केंद्र सुरू ठेवण्यात आले व उर्वरित तीन केंद्रे प्रशासनिक कारणास्तव बंद करण्यात आली. पुणे येथील सैनिक कल्याण विभागाच्या अखत्यारीतील हे एकमेव प्रशिक्षण केंद्र अहमदनगर येथे ३० जुलै २००४ पर्यंत कार्यरत होते.

प्रशासनिक अडचणींमुळे, महाराष्ट्र शासनाच्या आदेशानुसार अहमदनगर येथील पूर्व पात्रता प्रशिक्षण केंद्र १ ऑगस्ट २००४ पासून कायमस्वरूपी नाशिक रोड, नाशिक येथे हलविण्यात आले. या प्रशिक्षण केंद्रात एकावेळी पन्नास उमेदवारांना प्रवेश देता येतो. केंद्रात प्रवेश घेतलेल्या उमेदवारांना महाराष्ट्र शासनामार्फत मोफत निवास, प्रशिक्षण व भोजन सुविधा पुरविल्या जातात.